Ilinniakkap naammassereernerata kingorna nuna najugaq

Ilinniakkamik naammassinnittartut amerliartortillugit, nunamut allamut ilinniariarlutik aallartartut aamma amerliartorput. Pingaartumik ingerlariaqqiffiusumik ilinniarfinni ilinniartut aallartarput, nunatsinni ilinniakkat amerlasuut ingerlanneqarsinnaanngimmata. 2003-miit nunami allami ingerlariaqqiffiusumik ilinniakkamik aallartitsisartut 2021-mi amerlassusaat 2 pct.-imik apparsimavoq.

 

2021-mi ingerlariaqqiffiusumik ilinniakkamik ingerlatsisut tamakkerlutik 26 pct.-ii nunami allami ilinniartuupput. Ilinniakkap naammassereernerata kingorna ilinniartut ilaat angerlartarput, ilaalli nunani allaniiginnartarput.

 

Nunani allani ilinniartut

Piffissami 2003-miit 2021-mut inuussutissarsiornermi ilinniakkamik naammassinnereernerup kingorna ukioq siulleq ilinniartut agguaqatigiissillugu 63 pct.-ii suli nunani allani najugaqarput. Taakkunannga 21 pct.-it ingerlariaqqillutik ilinniartuupput. Amerlanertigut ilinniartut bachelorinngorniarnermik naammassinnereernerup kingorna kandidatinngorniarnermik ilinniaqqittarput. Titartagaq 1.-imittaaq takuneqarsinnaavoq ilinniakkamik naammassinnereernerup kingorna ukiuni siullerni marlunni ingerlariaqqiffiusumik ilinniakkanik ingerlatsisut amerlanerusut. Ingerlariaqqiffiusumik ilinniakkanik ingerlatsisut annertussusaata appariartornerani nunatsinnut utertartut annertussusaat qaffakkiartorpoq.

 

Titartagaq 1. Nunami allami ilinniakkap naammassereernerata kingorna ukiut 1-10 qaangiunnerini nuna najugaq, 2003-2021

Nalunaarut: inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)

 

Nunami allami ilinniakkamik naammassinnereernerup kingorna ukiumi siullermi ilinniartut 37 pct.-ii Kalaallit Nunaanni najugaqarput. Nunatsinnut utertartut najugaqalersartullu annertussusaat ukiuni tulliini qaffakkiartortarput. Ilinniakkamillu naammassinnereernerup kingorna ukiut arfineq-pingasut qulingiluallu qaangiunnerini amerlanerpaallutik. Tassani nunami allami ilinniakkamik naammassinnereernerup kingorna ilinniartut agguaqatigiissillugu 56 pct.-ii Kalaallit Nunaanni najugaqarput.

 

Kalaallit Nunaannut utertartut annertussusaat taamaaginnarpoq

Piffissaq sivisooq najoqqutaralugu sanilliussinermi, ukiut tamaasa nunami allami ilinniakkamik naammassinnittartut amerlannginnerat eqqumaffigineqartariaqarpoq. Nalunaarsuutit ukiuni ataasiakkaani nikerarnernut qajannaannerulersinniarlugit ukiut pingasukkaarlugit agguaqatigiissitsinerit atorneqarput.

 

Ukiut kingulliit ingerlanerini nunami allami ilinniakkamik naammassinnereernerup kingorna Kalaallit Nunaanni najugaqalersartut annertussusaat annertuumik allannguuteqarsimanngilaq. Ilinniakkap naammassereernerata kingorna ukiut siulliit 1-2 ingerlanerini annikitsunik assigiinngissuteqartoqarpoq. Ukiulli pingajussaanniit naligiileqqittarput. Taamaattumik nunanut allanut ilinniariarlutik nuuttartut amerlaneruleraluartut, angerlamut utertartut annertussusaannut tamanna sunniuteqanngilaq.

 

Titartagaq 2. Nunami allami ilinniakkap naammassereerneranit Kalaallit Nunaanni najugallit annertussusaat; 2005-imiit 2016-imut ukiut pingasukkaarlugit naatsorsukkat

Nalunaarut: inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)

 

Kalaallit Nunaanni ilinniartut

Ilinniartut Kalaallit Nunaanni inuussutissarsiornermi imaluunniit ingerlariaqqiffiusumik ilinniarnermik naammassinnissimasut nunami allami ilinniakkamik naammassinnissimasuniit amerlanertigut Kalaallit Nunaanniiginnartarput. Ukiullu qulit qaangiunnerini agguaqatigiissillugu 89 pct.-ii suli tamaani najugaqarput. Ilinniareernerulli kingorna nunatsinniiginnartartut annertussusaat ukiuni tamani appariartorpoq.

Titartagaq 3. Kalaallit Nunaanni ilinniakkap naammassereerneranit ukiut 1-10 qaangiunnerini Kalaallit Nunaanni najugallit annertussusaat, 2003-2021

Nalunaarut: inuussutissarsiornermi ingerlariaqqiffiusumillu ilinniakkat kisimik pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit takukkit (https://bank.stat.gl/UDNBD1)

 

 

Eqikkaaneq

 

Tabel 1. Ilinniartut nunami allami ilinniakkamik naammassinnissimasut amerlassusaat, 2011-2021

	2011	2012	2013	2014	2015	2016	2017	2018	2019	2020	2021
Inuussutissarsiornermik ilinniarneq	22	10	21	17	20	21	23	30	21	29	17
Ingerlariaqqiffiusumik ilinniarneq	58	82	87	80	75	90	117	111	96	94	84
Katillugit	80	92	108	97	95	111	140	141	117	123	101

 

 

Tabel 2. Ilinniartut nunami allami ilinniakkamik naammassinnereernerup kingorna ukiut 1-10 qaangiunnerini Kalaallit Nunaanni najugallit amerlassusaat, 2011-2021

	2011	2012	2013	2014	2015	2016	2017	2018	2019	2020	2021
Ukioq siulleq	32	30	44	41	30	46	46	54	37	52	35
Ukiut marluk	36	34	51	40	39	53	56	59	47	55	0
Ukiut pingasut	42	40	50	48	42	56	59	66	57	0	0
Ukiut sisamat	48	41	57	51	50	65	67	69	0	0	0
Ukiut tallimat	45	43	57	52	47	68	74	0	0	0	0
Ukiut arfinillit	47	46	56	50	50	69	0	0	0	0	0
Ukiut arfineq-marluk	45	42	57	52	53	0	0	0	0	0	0
Ukiut arfineq-pingasut	50	46	60	53	0	0	0	0	0	0	0
Ukiut qulingiluat	50	49	64	0	0	0	0	0	0	0	0
Ukiut qulit	52	49	0	0	0	0	0	0	0	0	0